आज देशभर श्रद्धा, भक्ति र उल्लासका साथ श्रीकृष्ण जन्माष्टमी पर्व मनाइँदैछ। भगवान विष्णुको आठौं अवतारका रूपमा पूजनीय भगवान श्रीकृष्णको जन्मोत्सव भाद्र कृष्ण अष्टमीका दिन परेकाले यस दिनलाई विशेष धार्मिक पर्वका रूपमा मनाइने गरिन्छ।
मध्यरातमा कृष्णको जन्मसमयलाई लक्षित गर्दै मठ–मन्दिरमा विशेष पूजाआजा, भजन–कीर्तन र गीता पाठ हुने क्रम चलिरहेको छ। भक्तजनहरूले उपवास बस्ने, दान–पुण्य गर्ने र कृष्ण मन्दिरमा दर्शन गर्ने परम्परा छ।
काठमाडौँ उपत्यकाको पाटनस्थित ऐतिहासिक कृष्ण मन्दिरमा भव्य धार्मिक कार्यक्रम आयोजना गरिएको छ। भक्तपुर, गोकर्ण, लुम्बिनी, चितवन, बुटवलसहितका स्थानमा समेत भजन–कीर्तन, झाँकी प्रदर्शन र सामूहिक प्रार्थनाले पर्वलाई विशेष बनाएको छ।
श्रीकृष्णलाई ग्वालबाल, बासुरी वाजाउने दिव्य गोठालो, माखन चोर, र राधासँगको आध्यात्मिक प्रेमका प्रतीकका रूपमा स्मरण गरिन्छ। उनले महाभारतको युद्धभूमिमा अर्जुनलाई दिएको भगवद्गीता उपदेश आज पनि जीवनमार्गदर्शक मानिन्छ।
सांस्कृतिक दृष्टिले यो पर्वले ग्रामीण जीवनशैली, कृषि–संस्कृति, प्रेम र भक्तिको परम्परालाई जीवन्त राख्ने काम गरेको छ। साथै, सामूहिक भजन–कीर्तन र दही–हाण्डी जस्ता खेलमार्फत सामाजिक एकता र आपसी सद्भावलाई मजबुत बनाउने परम्परा यस दिनसँग जोडिएको छ।
धार्मिक पण्डितहरूका अनुसार कृष्ण जन्माष्टमीले धर्म, नीति र भक्तिपथमा समाजलाई अघि बढ्न प्रेरणा दिने संदेश दिन्छ।
